logo

Aqmescit rayonında Derviza bayramı qayd etildi (FOTO)

derviza_guardeiskoe-8 (Copy)

Aqmescit rayonında Derviza bayramı qayd etildi (FOTO)

Qırım Müftisiniñ muavini Ayder İsmailov qırımtatar medeniyetine bağışlanğan “Derviza” bayramında iştirak etti. Merasim Aqmescit rayonı Sarabuz köyünde ötkerildi. Eñ başında Ayder İsmailov dua oqup, musafirlerge sağlıq, amanlıq, bol bereket tiledi.

Derviza  – Allah bergen bereket, eyiliklerge şükür etmek demektir. Er birimiz bunıñ qıymetini bilmelimiz. Biz, muqaddes topraqlarda yaşap, çalışamız, tuvğan mekânımızda, kelecek nesiller içün hızmet etemiz”,  – dedi Ayder oca.

Rayon sakinleri ve musafirleri içün şeñ kontsert, yarmalıq, master-klass taqdim etildi, balalar ise, oynap, eglendiler.

Sarabuz köyüniñ sport meydanında em Aqmescit rayonı. Em de Qarasuvbazar, Saq rayonı, Aqmescit ve Kezlevden kelgen eñ eyi icadiy taqımlar kontsert programmasını numayış ettiler.

Bu cümleden, Ukraina ve Tatarstanda nam qazanğan artist Server Kakuranıñ reberliginde “Qırım” ansambli bayramnı yaraştırdılar.

Toplaşqanlar ögünde Aqmescit rayonı memuriyetiniñ yolbaşçısı İrini Boyko, Sarabuz qasabasınıñ reberi İgor Çiçkin, fahriy musafirler  – QC DŞ reis muavini Remzi İlyasov, RF Prezidenti yanında milletlerara munasebetleri boyunca Şuranıñ azası Eskender Bilâlov, milletlerara munasebetler boyunca Devlet komitetiniñ reisi Zaur Smirnov, “Yedinaya Rossiya” firqasınıñ yerli bölüginiñ kâtibi Aleksandr Milaşenko çıqışta bulunıp, hayırladılar. Bayramda Aqmescit rayonı ve başqa rayonlardan musafirler bulundılar.

Esnafçı ve ustalar öz eser ve  işlerini numayış ettiler, bunıñnen beraber, köy hocalığı yarmalığı da çalıştı.

Festival çerçivesinde erkekler ve ösmürler arasında Küreş sport çeşiti boyunca yarış teşkil etildi. Yarışta 2006, 2004, 2003, 2000 seneleri doğğan balalar ve 17 yaşından büyük erkekler, umumen 100 sportçı küçlerini sınap baqtılar. Ğalipler akimiyet vekilleri tarafından taqdirlendiler.

Eñ yaş iştirakçi”, “Eñ güzel tehnika”, “Ğalebege ıntılğan sportçı” nominatsiyalarında ğalip çıqqanlar Aqmescit rayonı memuriyeti reisi tarafından Kubok qazandılar. Absolüt kategoriyasında Perevalnoye köyünden Dilâver Baliç 1-nci yerge nail oldı. Sportçı mukâfat olaraq qoy aldı.

Eñ kiçik musafirler içün attraktsionlar, at kezintileri, “ebru” sanatı boyunca master –klass keçirildi. Er iştirakçi bahşış aldı.

Bayram adet üzre horan ile yekünlendi. Tedbirge tahminen 3 biñ insan qatıldı.

Spravka: Derviza – bereket bayramıdır. Adetince, Derviza sentâbrniñ 22-nde qayd etile. Bu künge qadar tarlalarda bütün işler yekünlenip, bereket cıyıla edi. Soñunda ise, cemaat tarafından büyük bayram teşkil etile edi. Bayram duanen başlap, qurban ketirilip, yarmalıq, oyunlar, yarışlarnen yaraştırıla edi. Soñunda er kes horan oynadı.

QMDİ MDT matbuat hızmeti (Aqmescit rayonı memuriyeti intsormatsion tehnologiyaları ve matbuat vastaları ile işbirlik bölüginiñ malümatına esaslanğan)

Aqmescit rayonında Derviza bayramı qayd etildi (FOTO)

 




 

 

 

Etiketler: » » »
Share

Yorum yapabilmek için Giriş yapın.